Chiking
Latest News

മടങ്ങി വരാൻ ഇതാണ് പറ്റിയ സമയമെന്ന് കുമ്മനം

Web Desk
Indian Telegram Android App Indian Telegram IOS App

തിരുവനന്തപുരം: രാഷ്ട്രീയത്തിലേയ്ക്കുള്ള തിരിച്ചുവരവ് താന്‍ ആഗ്രഹിച്ചിരുന്നതായി വെളിപ്പെടുത്തി കുമ്മനം രാജശേഖരന്‍. പാര്‍ട്ടിയ്ക്കും താന്‍ തിരിച്ചുവരണമെന്ന് ആഗ്രഹമുണ്ടായിരുന്നുവെന്നും ഇതാണ് അതിന് പറ്റിയ സമയമെന്നും കുമ്മനം രാജശേഖരന്‍ പറഞ്ഞു. മിസോറം ഗവര്‍ണര്‍ സ്ഥാനത്തു നിന്ന് രാജിവെച്ച ശേഷം ഒരു മലയാളം വാര്‍ത്താ ചാനലിനോട് പ്രതികരിക്കുകയായിരുന്നു അദ്ദേഹം.

തന്റെ മടങ്ങിവരവ് പാര്‍ട്ടിയും ആഗ്രഹിച്ചിരുന്നു. പാര്‍ട്ടിയ്ക്കും തനിക്കും അങ്ങനെ തോന്നിയതു കൊണ്ട് മടങ്ങി വരാനുള്ള പറ്റിയ സമയമാണ് ഇതെന്ന് തോന്നിയെന്നും പാര്‍ട്ടി നേതൃത്വം തന്നോട് രാജിവെക്കാന്‍ ആവശ്യപ്പെടുകയായിരുന്നുവെന്നും കുമ്മനം പറഞ്ഞു. നേരത്തെ പാര്‍ട്ടി കേന്ദ്രനേതൃത്വം ഇക്കാര്യം ആവശ്യപ്പെട്ടിരുന്നുവെന്നും എന്നാല്‍ മിസോറാമിലെ ചില തിരക്കുകള്‍ മൂലം സാധിക്കാതെ വന്നെന്നും അദ്ദേഹം പറഞ്ഞു. എന്താണ് ചെയ്യേണ്ടതെന്ന് കേരളത്തില്‍ വന്ന ശേഷം തീരുമാനിക്കുമെന്നും അദ്ദേഹം പറഞ്ഞു.

അതേസമയം ലോക്‌സഭാ തെരഞ്ഞെടുപ്പില്‍ തിരുവനന്തപുരം മണ്ഡലത്തില്‍ നിന്നുള്ള ബിജെപി സ്ഥാനാര്‍ത്ഥിയാണ് കുമ്മനം രാജശേഖരനെന്ന് ഏതാണ്ട് ഉറപ്പായി. കുമ്മനം ഗവര്‍ണര്‍ സ്ഥാനം രാജിവെച്ചതോടെ അസം ഗവര്‍ണര്‍ക്കാണ് മിസോറാമിന്റെ ചുമതല നല്‍കിയിരിക്കുന്നത്.
ഇന്നാണ് രാഷ്ട്രപതി രാംനാഥ് കോവിന്ദ് കുമ്മനം രാജശേഖരന്റെ രാജി അംഗീകരിച്ചത്. കോണ്‍ഗ്രസിന്റെ ശശി തരൂരിനെതിരെ തിരുവനന്തപുരത്ത് ശക്തനായ സ്ഥാനാര്‍ത്ഥി എന്ന നിലയ്ക്ക് ബിജെപിയ്ക്ക് വേണ്ടി കുമ്മനം ജനവിധി തേടണമെന്ന നിലപാടില്‍ ആര്‍എസ്എസ് ഉറച്ചു നില്‍ക്കുകയാണ്. കേരളത്തില്‍ ബിജെപിയുടെ ഏറ്റവും വിജയസാധ്യതയുള്ള സ്ഥാനാര്‍ത്ഥിയായാണ് കുമ്മനം രാജശേഖരന്‍ വിലയിരുത്തപ്പെടുന്നത്.

Top